किन्ने नै भयो त एभरेष्ट बैंकले आइसिएफसी फाइनान्स ?

एभरेष्ट बैंक (Everest Bank Ltd) ले आइसिएफसी फाइनान्स (ICFC Finance Limited) किन्ने तयारी अन्तिम चरणमा पुगेको बैंक स्रोतको बताएको छ । तर, अहिलेसम्म आइसिएफसी फाइनान्सबाट सञ्चालक समितिमा एक जना जाने, प्रमुख कार्यकारी अधिकृत एभरेष्ट बैंककै हुने जस्ता कुरामा सहमति भएपनि अन्य विषय जस्तै, शेयर अनुपात कसरी मिलाउने भन्ने बारेमा भने अझै सहमति हुन बाँकी रहेको स्रोतको दाबी छ ।

तर, अहिलेसम्म भएको प्रगतिको बारेमा दुवै पक्षबीच गोप्य राख्ने सहमति भएको बुझिएको छ । एभरेष्ट बैंकसँग अन्य धेरै वित्तीय संस्थासँग मर्जरको हल्ला चलाइयो तर राष्ट्र बैंकले ८ अर्ब चुक्ता पूँजी पु¥याउने दिएको समय सिमा नजिकिंदै आएकाले यस पटकको आइसिएफसी फाइनान्ससँगको मर्जर भने नरोकिने स्रोतको भनाइ छ । आइसिएफसी फाइनान्ससँगको मर्जको हल्ला संस्थाहरुको व्यवस्थापनमा मात्र सिमित नभइ शेयर बजारसम्म आएपछि आइसिएफसी फाइनान्सको शेयर मूल्य प्रतिकित्ता ८ रुपैयाँसम्म बढेको छ ।

हिजो (मंगलबार) समग्र बजार ३९.५७ विन्दुले ओरालो लागेको बेला पनि उक्त फाइनान्सको मूल्य भने बढ्नुलाई लगानकर्ताले अर्थपूर्ण रुपमा हेरेका थिए । सूचनाको पहँुच भएका व्यक्तिले उक्त फाइनान्सको शेयर खरिद गरिरहेका थिए भने केही लगानीकर्ताले त्यस्तो सूचनालाई हल्लाको रुपमा लिएका थिए । केहीले भने एभरेष्ट बैंकले खरिद गर्दै छ भन्ने सम्मको सुइको समेत पाएका थिएनन् ।

हिजो (मंगलबार) उक्त फाइनान्सको शेयर पनि ४४ हजार ५५ कित्ता कारोबार भयो । न्यूनतम मूल्य ३१८ रुपैयाँ र अधिकतम मूल्य ३४२ रुपैयाँमा उक्त फाइनान्स कम्पनीको शेयर कारोबार हुन पुगेको थियो । कारोबारको अन्तिममा ३२० रुपैयाँमा कारोबार भएर रोकिन पुग्यो ।

केही चलाख लगानीकर्ताले गोप्य सूचना पाएका कारण उक्त फाइनान्सको शेयर उठाइरहेको केहि ब्रोकरको भनाइ छ । तर, एभरेष्ट बैंक र उक्त फाइनान्सको शेयर अनुपात कति रहने भन्ने कुरा बाहिर नआइसकेकाले पनि अहिले सेयर किन्नेले फाइदा नै लिन सक्छन भन्ने भने छैन् ।

उता, एभरेष्ट बैंकले मर्जरका लागि उपयुक्त पार्टनको खोजी गर्दै वैशाख २० गते विशेष साधारणसभा बोलाएको छ । मर्जर तथा एक्विजिसनको मूख्य एजेण्डा लिएर बोलाएको उक्त विशेष साधारण सभासँगै शेयर मूल्यमा उच्च गिरावट आएको छ । हकप्रद शेयर दिने आशामा बसेका लगानीकर्ताहरुमा निराशा छाएपछि भटाभट शेयर बिक्री गर्दा शेयर मूल्यमा भारी गिरावट आएको हो ।

एभरेष्ट बैंकको शेयर मूल्य हिजो (मंगलबार) प्रतिकित्ता २ सय ४ रुपैयाँले घट्न पुग्यो । प्रतिकित्ता २ हजार ९ रुपैयाँमा किनबेच हुँदै आएको शेयर मूल्य १ हजार ८ सय ४५ रुपैयाँमा झरेको थियो । आइसिएफसी फाइनान्स लगायतका अन्य फाइनान्सलाई किन्ने कुरा गरेपछि लगानीकर्ताले आशा गरेको हकप्रद र बोनस शेयर नआउने हो कि भन्ने आशंका बढ्दै जादा लगानीकर्ताले धमाधम शेयर बिक्री गर्न थाल्दा शेयर मूल्य घटेको हो ।

नेपाल राष्ट बैंकमा चुक्ता पूँजी कसरी ८ अर्ब पुरयाउने भन्ने सम्बन्धमा पेश गरेको योजनामा पनि मर्जर वा एक्विजिसनलाई एभरेष्ट बैंकले प्राथमिकता दिएको थियो ।

Leave a Reply

Your email address will not be published. Required fields are marked *